Нууцлалын бодлого

AutoGo бол таны машинтай холбоотой үйлчилгээг нэг дор цуглуулсан аппликейшн юм — даатгал худалдан авах, торгууль, татвар, замын хураамж төлөх, машины зах зээлийн үнэ шалгах, ослын үед тусламж авах. Энэ аппликейшн ажиллахын тулд таны хувийн мэдээлэл шаардлагатай болдог. Энэ баримт нь яг ямар мэдээлэл, яагаад, хэнд дамждаг, хэр удаан хадгалагддаг, мөн та үүнийг хэрхэн устгуулах вэ гэдгийг тайлбарлана.

1. Бид хэн бэ

AutoGo аппликейшныг Гэрэгэ системс эзэмшиж, ажиллуулдаг. Энэ баримтад “бид”, “манай” гэж бичсэн нь Гэрэгэ системс-ийг хэлнэ.

Гэрэгэ системс
Улсын бүртгэлийн дугаар: 6235972
Хаяг: Улаанбаатар, Сүхбаатар дүүрэг, 1-р хороо, Олимп 5, Аюуд тауэр, 12 давхар

2. Бид ямар мэдээлэл цуглуулдаг вэ

2.1. Таны өөрөө оруулсан мэдээлэл

Мэдээлэл	Хаанаас	Юунд
Утасны дугаар эсвэл имэйл хаяг	Нэвтрэх хэсэг	Таныг таних цорын ганц түлхүүр. Нэг удаагийн код (OTP) илгээхэд ашиглана.
Тээврийн хэрэгслийн улсын дугаар	Даатгал авах, торгууль шалгах, үнэлгээ хийх үед	Улсын бүртгэлээс машины мэдээлэл болон төлбөрийн үлдэгдэл татахад.
Гэр бүлийн гишүүний регистрийн дугаар	“Миний хүмүүс” хэсэгт нэмэх үед	Тэдний нэрээр даатгал хийлгэх. Энэ нь өөр хүний хувийн мэдээлэл тул та тэднээс зөвшөөрөл авсан байх үүрэгтэй.
Гэмтлийн зураг, тээврийн хэрэгслийн баримтжуулах зураг	Камер эсвэл зургийн сан	Даатгалын нөхөн төлбөрийн хүсэлт, гэрээ байгуулсны дараах баримтжуулалт.
Ослын тайлбар, болсон газар, огноо; хүн гэмтсэн эсэх, гуравдагч тал оролцсон эсэх	Үнэлгээний хүсэлтийн маягт	Хохирлын үнэлгээ хийх.
Чат-д бичсэн мессеж	Туслах хэсэг	Асуултад хариулах. 6 дугаар хэсгийг заавал уншина уу.
Имэйл хаяг (профайлд засварлах)	Профайл	Холбоо барих. Одоогоор энэ хаягийг баталгаажуулдаггүй.

2.2. Төрийн болон түншийн системээс авдаг мэдээлэл

Танаас бичиж оруулахыг шаарддаггүй боловч таны нэрийн өмнөөс дараах эх сурвалжаас татдаг:

ДАН (төрийн цахим танилт). Та биеийн байцаалтаа баталгаажуулахаар сонгосон үед ДАН-ын хуудас руу шилжинэ. Нууц үгээ манай апп-д оруулдаггүй. ДАН буцаан илгээдэг мэдээлэлд: регистрийн дугаар, эцэг/эхийн нэр, өөрийн нэр, овог, иргэний бүртгэлийн дугаар, хүйс, төрсөн огноо, аймаг/сум/багийн нэр, хаягийн дэлгэрэнгүй, мөн таны цээж зураг.
Gerege Core. Регистрийн дугаараар нэр, хүйс, хаяг зэрэг иргэний бүртгэлийн мэдээлэл шалгах.
ХУР (XYP) системийн тээврийн хэрэгслийн бүртгэл. Улсын дугаараар машины марк, загвар, үйлдвэрлэсэн он, арлын дугаар, мөн эзэмшигчийн нэр болон регистрийн дугаар буцаана. Өөрийн бус машины дугаар шалгавал тухайн эзэмшигчийн мэдээлэл манай системд ирнэ гэсэн үг.

2.3. Автоматаар үүсдэг мэдээлэл

Төхөөрөмжийн танигч. Апп суулгах үед санамсаргүй үүсгэсэн дугаар (UUID). Энэ нь Apple-ийн зар сурталчилгааны танигч (IDFA) ч биш, төхөөрөмжийн үйлдвэрийн дугаар ч биш. Зөвхөн аль төхөөрөмжөөс нэвтэрсэнийг ялгахад ашиглана.
Мэдэгдлийн токен. Та мэдэгдэл хүлээн авахыг зөвшөөрсөн тохиолдолд л үүснэ.
Үйлчилгээний нөхцөл зөвшөөрсөн бичлэг. Хувилбар, хэл, таны IP хаяг болон хөтчийн/аппын танилт мөр. Энэ нь та хэзээ юуг зөвшөөрсөн болохыг нотлох зорилготой.
Үйлдлийн лог. Апп-аас илгээсэн хүсэлт бүр серверт бүртгэгдэнэ — хандсан хаяг, хариуны төлөв, хугацаа, мөн хүсэлтийн агуулга. Алдаа шалгах, маргаан шийдвэрлэх, залилангаас хамгаалах зорилготой.

3. Төхөөрөмжийн зөвшөөрөл

Апп нь доорх зөвшөөрлүүдийг асуудаг. Аль нь ч апп нээхэд шаарддаггүй — зөвхөн тухайн үйлдлийг хийх агшинд асууна. Татгалзсан ч апп-ын бусад хэсэг ажиллана.

Зөвшөөрөл	Юунд ашигладаг
Камер	Тээврийн хэрэгслийн болон гэмтлийн зураг авах.
Зургийн сан	Өмнө нь авсан зургаа сонгож хавсаргах.
Байршил (зөвхөн апп нээлттэй үед)	Хоёр зүйлд. Цаг агаар: таны байршлыг хамгийн ойрын аймгийн төвд хувиргаад л гадаад цаг агаарын үйлчилгээ рүү илгээдэг — тэд таны яг байршлыг авдаггүй. Ослын дэлгэц: координатыг санах ойд хуулж өгдөг бөгөөд та өөрөө хаа нэгтээ буулгаж илгээхээс нааш хаашаа ч илгээгддэггүй.

Android дээр өөр байдаг зүйл. Android дээр мэдэгдэл илгээхэд тусдаа зөвшөөрөл нэмж асуудаг (iOS дээр энэ нь зөвшөөрлийн жагсаалтад ордоггүй). Харин зургийн сангийн зөвшөөрөл Android дээр огт шаардлагагүй — системийн зураг сонгогчийг ашигладаг тул таны сонгосон яг тэр зураг л апп руу дамждаг, бусад зурагт хандах эрх апп-д байхгүй.

Апп нь микрофон, харилцагчийн жагсаалт, хуанли, Face ID-д хандахыг асуудаггүй. Мөн зар сурталчилгааны болон хэрэглэгчийн зан төлөв хянах (analytics/tracking) ямар ч гуравдагч талын хэрэгсэл суулгаагүй. Таны үйлдлийг өөр апп, вэбсайт дээр дагаж мөрддөггүй.

Зурагт хийгддэг зүйл

Илгээхийн өмнө зураг бүрийг апп дахин боловсруулж жижигрүүлдэг. Үүний үр дүнд зурагт наалдсан EXIF мета өгөгдөл — тэр дотроо GPS байршлын тэмдэглэгээ — устдаг. Өөрөөр хэлбэл таны зургийн файлд байсан байршил бидэн рүү ирдэггүй.

Улсын дугаарыг зурагнаас уншиж таних үйлдэл нь таны утсан дээр хийгддэг. Энэ шалгалтад зориулж ямар ч зураг сервер рүү илгээгддэггүй.

4. ПИН код

Апп нээх ПИН код таны утаснаас гардаггүй. Утсан дээр нь шифрлэгдэж (SHA-256) хадгалагдаж, тэндээ шалгагдана. Сервер дээр зөвхөн “ПИН тохируулсан эсэх” гэсэн нэг тэмдэглэгээ л байдаг. Бид таны ПИН кодыг мэдэхгүй бөгөөд сэргээж өгөх боломжгүй.

5. Мэдээлэл хэнд дамждаг вэ

Бид таны мэдээллийг зардаггүй, зар сурталчилгааны зорилгоор хэнд ч дамжуулдаггүй. Доорх байгууллагууд нь үйлчилгээг ажиллуулахад зайлшгүй шаардлагатай тул мэдээлэл хүлээн авдаг — тус бүрд нь юу очдгийг нэрлэв.

Хэн	Юуны төлөө	Юу очдог
Gerege Accounts	Нэвтрэлт, нэг удаагийн код	Таны утасны дугаар эсвэл имэйл, мөн код.
Gerege Core	Иргэний бүртгэл шалгах	Регистрийн дугаар (таных, эсвэл таны нэмсэн гэр бүлийн гишүүнийх).
ДАН	Биеийн байцаалт баталгаажуулах	Бидний зүгээс зөвхөн үйлчилгээний танигч ба буцах хаяг. Таны нэвтрэлт ДАН дээр явагдана.
ХУР (XYP)	Тээврийн хэрэгсэл, иргэний бүртгэл	Улсын дугаар эсвэл регистрийн дугаар.
Даатгалын компаниуд (MIIS / АМИ систем)	Даатгалын гэрээ байгуулах	Нэр, регистрийн дугаар, утас, имэйл, улсын дугаар, даатгалын төрөл. Жолооч нэмсэн бол тэдний регистр, утас, имэйл.
QPay ба банкууд	Төлбөр	Төлөх дүн, нэхэмжлэхийн дугаар, гүйлгээний утга. Картын мэдээлэл апп руу огт ордоггүй.
Gerege-ийн төлбөрийн үйлчилгээ	Торгууль, татвар, замын хураамж	Шалгахад: зөвхөн улсын дугаар. Төлөхөд: улсын дугаар, таны регистрийн дугаар, имэйл — учир нь и-баримт эдгээрийн нэр дээр гарна.
Google (Firebase Cloud Messaging)	Мэдэгдэл хүргэх	Мэдэгдлийн токен, мөн мэдэгдлийн гарчиг, агуулга (жишээ нь “Таны даатгал дуусахад 7 хоног”).
SMS үйлчилгээ үзүүлэгч	Мессеж илгээх	Таны утасны дугаар ба мессежийн текст.
Хиймэл оюуны үйлчилгээ үзүүлэгч (OpenRouter)	Чат туслах	6 дугаар хэсгийг үзнэ үү.
Хохирлын үнэлгээний үйлчилгээ	Гэмтлийн урьдчилсан үнэлгээ	Машины марк, загвар, он, арлын дугаар, улсын дугаар, өнгө, таны бичсэн гэмтлийн тайлбар, мөн гэмтлийн зургийн холбоос.
Баримт үүсгэх үйлчилгээ	Гэрээний PDF гаргах	Гэрээний бүрэн мэдээлэл.
Цаг агаарын үйлчилгээ (Open-Meteo)	Цаг агаар харуулах	Зөвхөн аймгийн төвийн координат. Таны яг байршил биш.
Монголбанк	Валютын ханш	Хувийн мэдээлэл огт байхгүй.

Дээрхээс гадна хууль хяналтын байгууллагын албан ёсны шаардлагаар, эсвэл хууль тогтоомжид заасан тохиолдолд мэдээлэл гаргаж өгөх үүрэг бидэнд үүсч болно.

6. Хиймэл оюун ухаанд суурилсан туслах

Энэ бол хамгийн чухал хэсэг тул тодорхой бичье. Апп доторх чат нь манай сервер дээр ажилладаг програм биш. Таны бичсэн зүйл гуравдагч талын хиймэл оюуны үйлчилгээ рүү (OpenRouter, цаана нь OpenAI-ийн загвар) илгээгддэг, тэнд боловсруулагдаж хариу буцна. Энэ нь Монгол Улсын гадна байрлах үйлчилгээ юм.

6.1. Юу илгээгддэг вэ

Таны бичсэн мессеж бүрэн эхээрээ. Хэрэв та мессеж дотроо регистрийн дугаар, хаяг, эсвэл эрүүл мэндийн мэдээлэл бичвэл тэр нь хамт явна. Бид таны бичсэн текстийг урьдчилан цэвэрлэдэггүй.
Тухайн ярианы сүүлийн 10 харилцан яриа (контекст хадгалахын тулд).
Туслах хэрэгсэл ажиллуулсан бол түүний үр дүн — таны улсын дугаар, гэрээний дугаар, бүтээгдэхүүний нэр, гэрээний төлөв, даатгал хэнийг хамрааж буй, үнэлгээний хүсэлтийн дугаар, төлөв, огноо.

6.2. Юу илгээгддэггүй вэ

Дараах зүйлсийг зориудаар хиймэл оюун руу илгээдэггүй бөгөөд шаардлагатай үед таны дэлгэц дээр манай сервер шууд харуулдаг: даатгалын хураамж, нөхөн төлбөрийн дүн, гэрээний огноо, засварын үнэлгээний дүн, утасны дугаар, нэр, регистрийн дугаар, түгээмэл асуултын хариултын бүтэн текст.

6.3. Анхаарах зүйлс

Хиймэл оюун алдаж болно. Туслахын хариулт нь албан ёсны зөвлөгөө, даатгалын шийдвэр, хууль зүйн тайлбар биш. Эргэлзээтэй үед зуучлагч эсвэл даатгалын компанитайгаа шууд холбогдоно уу.
Чат-д нууц мэдээлэл бичихгүй байхыг зөвлөж байна — ялангуяа нууц үг, картын дугаар, эрүүл мэндийн дэлгэрэнгүй.
Буруу хариулт мэдээлэх. Туслахын хариулт буруу, доромжилсон, эсвэл хортой санагдвал тухайн хариулт дээр удаан дарж “Мэдээлэх” сонголтоор бидэнд шууд илгээнэ үү. Хүн уншиж шалгана.

Таны чат харилцан яриа манай сервер дээр бас хадгалагддаг — та дараа нь буцаж уншиж чадахын тулд.

7. Төлбөр

Картын дугаар, CVV, банкны нууц үг апп руу хэзээ ч ордоггүй. Төлбөрийг QPay эсвэл банкны апп дээр хийнэ. Бид зөвхөн төлбөр амжилттай болсон эсэх, нэхэмжлэхийн дугаар, дүнг хүлээн авдаг. Торгууль, татвар, замын хураамжийн и-баримт нь таны регистрийн дугаар, имэйл дээр гарах тул эдгээрийг төлбөрийн үйлчилгээ рүү дамжуулах шаардлагатай болдог.

8. Хадгалалт ба аюулгүй байдал

Апп болон серверийн хооронд явж буй бүх мэдээлэл шифрлэгдсэн (HTTPS, түүн дээр нэмэлт AES шифрлэлт).
Нэвтрэх эрхийн түлхүүр, ПИН-ий хэш нь iOS-ийн Keychain-д, зөвхөн тухайн төхөөрөмж дээр, түгжээ тайлагдсан үед л уншигдахаар хадгалагдана. Эдгээр нь iCloud нөөцөд ордоггүй.
Нэг харилцагч нэг удаад нэг төхөөрөмж дээр нэвтэрнэ. Шинэ төхөөрөмжөөс нэвтрэхэд өмнөх сессүүд хүчингүй болно.
Файл, зургууд манай өөрсдийн сервер дээр хадгалагддаг (гуравдагч талын CDN ашигладаггүй).

9. Хэр удаан хадгалдаг вэ

Юу	Хугацаа
Чат харилцан яриа	Сүүлийн мессежээс хойш 365 хоног, дараа нь автоматаар устана.
Бүртгэл устгах хүсэлтийн хүлээлгийн хугацаа	30 хоног (10 дугаар хэсэг).
Даатгалын гэрээ, нөхөн төлбөр, төлбөрийн баримт	Тогтмол нэг хугацаа байхгүй — даатгалын төрөл бүрээр өөр. Тухайн гэрээ хүчинтэй байх хугацаа, дээр нь нэхэмжлэл, маргаан гарах боломжтой хугацаа, мөн тухайн төрлийн даатгалд хууль тогтоомж, даатгагчийн журмаар тогтоосон хугацаа дуустал хадгална. Өөрийн гэрээний тодорхой хугацааг мэдэхийг хүсвэл доорх хаягаар хандана уу.
Биеийн байцаалт баталгаажуулалтын мэдээлэл, профайлын бичлэг	Таны бүртгэл байх хугацаанд хадгалагдана. Бүртгэлээ устгахад хамт устгагдана — ДАН-аас ирсэн төрсөн огноо, хаяг, зураг зэрэг мэдээлэл багтана.
Үйлдлийн лог	1 жил, дараа нь автоматаар устана.

10. Таны эрх

10.1. Үзэх, засах

Профайл хэсгээс өөрийн мэдээллээ хармагц харна. Имэйл хаягаа өөрөө засна. Нэр, регистрийн дугаар зэрэг иргэний бүртгэлийн мэдээлэл нь төрийн бүртгэлээс ирдэг тул апп-аас засах боломжгүй — алдаатай бол улсын бүртгэлийн байгууллагад хандана.

10.2. Бүртгэлээ устгах

Апп дотроос шууд устгуулна: Профайл → Бүртгэл устгах. Утас руу залгах, имэйл бичих шаардлагагүй. Апп-д нэвтрэх боломжгүй бол бүртгэл устгах хуудас-аар хүсэлт илгээнэ.

Устгах хүсэлт өгснөөс хойш 30 хоногийн хүлээлгийн хугацаа эхэлнэ. Энэ хугацаанд бодлоо өөрчилвөл цуцлах товч дарах, эсвэл зүгээр л дахин нэвтрэхэд хүсэлт цуцлагдана.
30 хоног өнгөрсний дараа: бүх төхөөрөмжийн нэвтрэлт хүчингүй болж, мэдэгдэл зогсож, таны мессежийн хайрцаг устаж, гэр бүлийн гишүүдтэй холбосон холбоос тасарч, таны бүртгэл хаагдана. Утасны дугаар чинь чөлөөлөгдөж, шинээр бүртгүүлэх боломжтой болно.
Биеийн байцаалт баталгаажуулалтын мэдээлэл болон профайлын бичлэг устана.
Устгагдахгүй зүйл: аль хэдийн байгуулагдсан даатгалын гэрээ, нөхөн төлбөрийн материал, төлбөрийн баримт. Эдгээр нь даатгалын харилцааны нотлох баримт тул хууль журмын дагуу хадгалагдана. Үйлдлийн лог 1 жилийн дотор устана.
Чат харилцан яриа устана — таны бичсэн бүх зурвас, туслахын хариулт, тэдгээрт холбогдох мэдээлсэн бичлэгүүдийн хамт бүрмөсөн устгагдана.

10.3. Зөвшөөрлөө буцаах

Байршил, камер, зургийн сан, мэдэгдлийн зөвшөөрлийг утасныхаа тохиргооноос хэзээ ч хааж болно: iPhone дээр Тохиргоо → AutoGo, Android дээр Тохиргоо → Апп-ууд → AutoGo → Зөвшөөрөл. Мэдээлэл боловсруулахыг бүхэлд нь зогсоох гэж байвал бүртгэлээ устгах нь цорын ганц бүрэн арга юм.

11. Хүүхэд

AutoGo нь тээврийн хэрэгсэл эзэмшигч, даатгуулагч насанд хүрсэн хүнд зориулагдсан. Бид 18-аас доош насны хүүхдийн мэдээллийг зориудаар цуглуулдаггүй. Хэрэв ийм мэдээлэл алдаатай орсныг мэдвэл бидэнд мэдэгдэнэ үү — устгана.

12. Энэ бодлого өөрчлөгдвөл

Бодлогод өөрчлөлт оруулбал энэ хуудсан дээр шинэ хувилбар, огнооны хамт нийтэлнэ. Мэдээлэл цуглуулах, дамжуулах хүрээнд томоохон өөрчлөлт гарвал апп дотор мэдэгдэж, дахин зөвшөөрөл авна.

13. Холбоо барих

Gerege Systems

Утас: +976 8881 0109
Имэйл: icesotgoo@gmail.com

Хаяг: Улаанбаатар, Сүхбаатар дүүрэг, 1-р хороо, Олимп 5, Аюуд тауэр, 12 давхар

Нууцлалтай холбоотой гомдол, хүсэлт, мэдээлэл авах, устгуулах хүсэлтийг дээрх хаягаар хүлээн авна.